Y Pwyllgor Cymeradwyo Rhaglenni (PCRh)

Rhaid i’r holl raglenni newydd ddilyn proses adolygu a chymeradwyo sy’n sicrhau eu bod yn addas i’w diben ac yn cyrraedd y safonau a bennir gan y Brifysgol ac asiantaethau allanol (gan gynnwys cyrff achredu neu broffesiynol), ac y byddant yn darparu profiad rhagorol i fyfyrwyr. Y Pwyllgor Cymeradwyo Rhaglenni yw’r Pwyllgor sy’n cael gorchwyl gan y Pwyllgor Safonau ac Ansawdd Academaidd i adolygu a chymeradwyo pob cynnig newydd am raglen, newidiadau i raglenni a modiwlau traws-sefydliadol newydd neu ddiwygiedig. 

Mae angen i’r holl raglenni newydd a diwygiedig gael eu hadolygu gan Bwyllgor Cymeradwyo Rhaglenni. Bydd angen i ddiwygiadau i raglenni presennol a rhaglenni a gafodd eu hatal am fwy na dwy flynedd fynd gerbron y Pwyllgor hefyd i sicrhau eu bod yn ateb gofynion yr Asiantaeth Sicrhau Ansawdd a’r Brifysgol.

Caiff y Pwyllgor Cymeradwyo Rhaglenni ei arwain gan Gadeirydd y Pwyllgor Cymeradwyo Rhaglenni ar y cyd â thri dirprwy, ac mae’n cynnwys amrywiaeth o staff academaidd a gweinyddol profiadol a hyfforddedig sy’n gweithio ar draws y Brifysgol, gyda chynrychiolwyr o bob Coleg/Ysgol. Hefyd, ceir arbenigwyr penodol mewn rhaglenni dysgu proffesiynol a dysgu seiliedig-ar-waith, rhaglenni cydweithredol a rhaglenni ymchwil ôl-raddedig. Mae myfyrwyr yn aelodau llawn o’r Pwyllgor, ac cael eu dewis o blith Cynrychiolwyr Colegau a Phynciau priodol a hyfforddedig a/ neu o’r Gymuned Adolygu Myfyrwyr. Lle y bo angen, mae Arbenigwyr Pwnc Allanol, Cyflogwyr neu randdeiliaid allanol perthnasol eraill yn cael eu gwahodd i ymuno â’r Pwyllgor dros dro, gan ddibynnu ar y cynnig sy’n cael ei ystyried. Cefnogir y Pwyllgor gan y Gwasanaethau Ansawdd Academaidd.

Mae myfyrwyr yn rhanddeiliaid allweddol yn y broses o ddatblygu a chymeradwyo rhaglenni newydd, ac felly maent yn aelodau llawn o’r Pwyllgor ac yn cael hyfforddiant mewn adolygu a chymeradwyo rhaglenni i sicrhau tegwch. Yn benodol, mae cynrychiolwyr myfyrwyr yn cael gorchwyl i adolygu cynigion dysgu, addysgu ac asesu, cymorth i fyfyrwyr a phrofiad myfyrwyr, ond mae disgwyl iddynt wneud yr un gwaith craffu ag aelodau eraill y Pwyllgor.

Bydd y Pwyllgor Cymeradwyo Rhaglenni yn cynnal adolygiad manwl o’r cynnig am raglen yn ei gyfanrwydd, gan gynnwys y modiwlau sy’n rhan o’r rhaglen, dogfennaeth ategol ac unrhyw ddogfennaeth ychwanegol ac adroddiadau sy’n ofynnol, gan gynnwys adroddiadau Diwydrwydd Dyladwy, ac adroddiadau ar Ymweliadau â Safleoedd a chyfleusterau ar gyfer cynigion Cydweithredol.

Bydd aelod academaidd o’r Pwyllgor Cymeradwyo Rhaglenni yn cael ei aseinio i bob rhaglen a bydd yr aelod hwn yn gweithredu fel adolygwr arweiniol. Bydd yr Adolygwr Arweiniol yn adolygu’r cynnig yn fanwl ac yn arwain cwestiynau’r Pwyllgor, gan gael arweiniad gan y Cadeirydd. Mae’n ofynnol i holl aelodau’r Pwyllgor adolygu’r holl raglenni, felly er mai’r Adolygwr Arweiniol fydd yn cynnal yr adolygiad mwyaf trylwyr, gall yr holl aelodau ofyn cwestiynau am unrhyw agwedd ar y cynnig.

Bydd aelodau’r Pwyllgor Cymeradwyo Rhaglenni yn ceisio sicrhau bod y rhaglen wedi’i meincnodi’n glir i lefelau perthnasol y Fframwaith Cymwysterau Addysg Uwch/FfCaChC, ac yn cyfeirio at Feincnodau Meysydd Pwnc yr Asiantaeth Sicrhau Ansawdd lle y bo’n briodol. Lle ceir mwy nag un maes pwnc, rhaid bod y rhaglen wedi’i dyfeisio’n dda, yn integredig ac yn gydlynus, a rhaid i’r cynnwys adlewyrchu’r teitl a’r dyfarniad a ddisgwylir. Hefyd, bydd y Pwyllgor Cymeradwyo Rhaglenni yn chwilio am Ddeilliannau Dysgu sy’n glir, yn effeithiol ac wedi’u diffinio’n dda ar gyfer y Rhaglen a’r Modiwlau, map cwricwlwm clir, strategaeth asesu effeithiol ac amrywiol a bod yr Aseswr Allanol/Arbenigwr Pwnc Allanol yn fodlon ar ansawdd a safon y cynnwys academaidd. Ar y cyfan, bydd y Pwyllgor Cymeradwyo Rhaglenni yn chwilio am raglen a fydd yn darparu profiad eithriadol i fyfyrwyr ac yn darparu profiad dysgu o ansawdd da. Caiff ystod lawn yr hyn y bydd y Pwyllgor Cymeradwyo Rhaglenni yn ei adolygu ei disgrifio yn y Rhestri Gwirio Cymeradwyo Rhaglenni.

Bydd Cynigiwr/Tîm Cynnig y Rhaglen yn cael ei wahodd i fod yn bresennol yng nghyfarfod y Pwyllgor Cymeradwyo Rhaglenni y bydd eu cynnig yn cael ei adolygu ynddo. Yn ystod y cyfarfod, gofynnir i Gynigiwr y Rhaglen ddarparu trosolwg fer o’r cynnig, ac yna ateb unrhyw gwestiynau a godir gan y Pwyllgor am feysydd y maent hwy o’r farn bod angen rhagor o wybodaeth amdanynt neu eu hegluro’n fwy, dan arweiniad yr Adolygwr Arweiniol. Unwaith y mae’r Pwyllgor wedi cwblhau ei gwestiynau, gofynnir i Dîm y Cynnig adael yr ystafell, tra bo’r Pwyllgor yn trafod y canlyniad. Wedyn gofynnir i Dîm y Cynnig ddychwelyd i drafod unrhyw faterion pellach a adnabuwyd, a chael penderfyniad y Pwyllgor.

Gwahoddir Cynigiwr/Tîm Cynnig y Rhaglen i fod yn bresennol yng nghyfarfod y Pwyllgor Cymeradwyo Rhaglenni y bydd eu cynnig yn cael ei adolygu ynddo, a byddant yn cael slot amser penodol (sylwer bod trafodaethau am gynigion blaenorol yn gallu rhedeg yn hwyr o bryd i’w gilydd). Bydd yn ofynnol i Dîm y Cynnig ateb unrhyw gwestiynau am unrhyw agweddau ar y cynnig sy’n ymwneud ag ansawdd academaidd, cynnwys neu brofiad myfyrwyr.

Fel arfer dylai tîm y cynnig gynnwys Cyfarwyddwr y Rhaglen, aelodau o staff o’r maes penodol y mae a wnelo’r cynnig am raglen ag ef, os yw lleoliadau gwaith/opsiynau ar gyfer blwyddyn dramor wedi’u cynnwys yn y cynnig, yr aelod perthnasol o staff ar gyfer y maes hwnnw, ynghyd ag aelod gweinyddol o staff sy’n gysylltiedig â’r adran.

Rôl allweddol y Pwyllgor Cymeradwyo Rhaglenni yw sicrhau ansawdd darpariaeth newydd a sicrhau ansawdd y profiad ar gyfer myfyrwyr a ddarperir gan y ddarpariaeth newydd. Bydd y Pwyllgor yn craffu’n fanwl ar yr holl elfennau academaidd o’r rhaglen a’r elfennau ohoni sy’n canolbwyntio ar fyfyrwyr, a bydd cynrychiolydd/cynrychiolwyr myfyrwyr y Pwyllgor hefyd yn canolbwyntio ar yr agweddau sy’n ymwneud â phrofiad myfyrwyr. Yn arbennig ar gyfer rhaglenni cydweithredol, bydd y Pwyllgor yn rhoi sylw manwl i’r modd y mae tîm y cynnig yn amcanu at sicrhau profiad tebyg a theg i’r holl fyfyrwyr nad ydynt yn astudio ar Gampws y Bae na Champws y Parc, a sut y bydd y myfyrwyr hyn yn cael mynediad at gyfleusterau, adnoddau a chymorth priodol.

Unwaith y bydd y Pwyllgor Cymeradwyo Rhaglenni wedi adolygu’r cynnig yn fanwl ac wedi dod i gasgliad, bydd yn penderfynu a ddylai’r rhaglen gael ei chymeradwyo ai peidio. Caiff canlyniadau’r broses Cymeradwyo Rhaglenni eu nodi isod. Cymeradwyo Lle mae’r rhaglen yn cwrdd â holl ddisgwyliadau’r Pwyllgor, neu lle mae unrhyw ddiwygiadau’n fân ddiwygiadau, bydd y Pwyllgor yn cymeradwyo’r rhaglen gydag amodau. Mae’n dal yn bosibl i’r Pwyllgor wneud argymhellion ar gyfer gwella’r rhaglen ymhellach. Cymeradwyo gyda Chadarnhadau Lle mae’r rhaglen yn gadarn ar y cyfan ac yn cwrdd â’r rhan fwyaf o ddisgwyliadau’r Pwyllgor, lle mae’n ofynnol gwneud gwaith ychwanegol cyn bod y Pwyllgor yn fodlon bod y rhaglen yn addas i’w darparu, ond lle mae’n hyderus fel arall bod Tîm y Cynnig yn gallu cwblhau unrhyw faterion sy’n dal i fodoli o fewn ffrâm amser ddiffiniedig, yna gall y Pwyllgor ddewis cymeradwyo’r rhaglen yn amodol ar gwblhau cadarnhadau. Rhaid mynd i’r afael â’r holl gadarnhadau a rhaid iddynt gael eu hadolygu’n derfynol gan y Pwyllgor Cymeradwyo Rhaglenni cyn y gall y rhaglen gael ei darparu i fyfyrwyr, ond ystyrir bod y rhaglen wedi’i chymeradwyo’n llawn o’r adeg cymeradwyo. Gall y Pwyllgor wneud argymhellion ar gyfer gwella’r rhaglen ymhellach hefyd. Fel arfer dylid mynd i’r afael â chadarnhadau o fewn un mis i gyfarfod y Pwyllgor Cymeradwyo Rhaglenni lle caiff y penderfyniad cymeradwyo ei gadarnhau, ond gall y Pwyllgor ganiatáu ffrâm amser hwy gan ddibynnu ar natur y cadarnhadau (e.e. ar gyfer gwaith adeiladu neu recriwtio arfaethedig). Cymeradwyo gydag Amodau Lle mae’r rhaglen yn gadarn ar y cyfan ac yn cwrdd â’r rhan fwyaf o ddisgwyliadau’r Pwyllgor, ond lle mae’n ofynnol gwneud gwaith ychwanegol cyn bod y Pwyllgor yn fodlon cymeradwyo’r rhaglen, yna gall y Pwyllgor ddewis cymeradwyo’r rhaglen gydag amodau. Rhaid mynd i’r afael â’r holl amodau a rhaid iddynt gael eu hadolygu’n derfynol gan y Pwyllgor Cymeradwyo Rhaglenni cyn y gellir ystyried bod y rhaglen yn addas i gael ei chymeradwyo’n llawn. Gall y Pwyllgor wneud argymhellion ar gyfer gwella’r rhaglen ymhellach hefyd. Rhaid mynd i’r afael â’r amodau o fewn un mis i’r digwyddiad Cymeradwyo er mwyn sicrhau na cheir oedi diangen cyn lansio’r rhaglen. Peidio â Chymeradwyo: Atgyfeirio at y Coleg Os nad yw’r rhaglen yn mynd i’r afael â’r materion allweddol (a ddylai fod yn brin iawn oherwydd y cam craffu cychwynnol) yna bydd y Pwyllgor yn ei hatgyfeirio’n ôl at y Coleg sy’n ei chynnig gydag ystod o argymhellion ar gyfer ei gwella. Gan ddibynnu pryd y bydd hyn yn digwydd yn ystod y flwyddyn academaidd, gall y Pwyllgor benderfynu hefyd na all y rhaglen redeg a bod rhaid oedi cyn ei lansio, a fydd yn amlwg yn effeithio ar gynlluniau recriwtio ac y dylid ei osgoi lle bynnag y bo’n bosibl.

Os oes cadarnhadau’n gysylltiedig â chymeradwyo eich rhaglen, rhaid mynd i’r afael â’r rhain yn llawn a rhaid cael cymeradwyaeth gan y Pwyllgor Cymeradwyo Rhaglenni cyn y gall y rhaglen gael ei darparu ar gyfer myfyrwyr. Lle mae cadarnhadau wedi’u pennu, byddant wedi’u diffinio o fewn y System Cymeradwyo a Rheoli Rhaglenni neu drwy Ffurflen Ymateb i Amodau/Cadarnhadau (fel y bo’n briodol), a bydd ymatebion llawn a seiliedig-ar-dystiolaeth yn ofynnol, y gallant olygu bod gwelliannau pellach yn ofynnol i ddogfennaeth y cynnig. Nid yw cadarnhadau’n effeithio ar gymeradwyo’r rhaglen, ond oni bai yr ymdrinnir â hwy gall y Pwyllgor dynnu’r gymeradwyaeth yn ôl ar unrhyw adeg i ddiogelu profiad myfyrwyr, a all achosi niwed i enw da’r Brifysgol a niwed ariannol iddi. Sylwer: mae cyflawni cadarnhadau’n un o’r gofynion ar gyfer darparu.

Os oes amodau’n gysylltiedig â chymeradwyo eich rhaglen, rhaid mynd i’r afael â’r rhain yn llawn a rhaid cael cymeradwyaeth gan y Pwyllgor Cymeradwyo Rhaglenni cyn y gellir ystyried bod rhaglen wedi’i chymeradwyo a’i bod felly’n gallu cael ei darparu ar gyfer myfyrwyr. Lle mae amodau wedi’u pennu, byddant wedi’u diffinio o fewn y System Cymeradwyo a Rheoli Rhaglenni neu drwy Ffurflen Ymateb i Amodau (fel y bo’n briodol), a bydd ymatebion llawn a seiliedig-ar-dystiolaeth yn ofynnol, a gallant olygu bod gwelliannau pellach yn ofynnol i ddogfennaeth y cynnig. Ni all rhaglen â chymeradwyaeth amodol gael ei marchnata a mynd ati’n ffurfiol i recriwtio myfyrwyr nes ymdrinnir â’r amodau a bod y rhaglen wedi cael ei chymeradwyo gan y Pwyllgor Cymeradwyo Rhaglenni. Sylwer: mae cyflawni cadarnhadau’n un o’r gofynion ar gyfer darparu.

Dylai’r Ffurflen Ymateb i Amodau/Cadarnhadau gael ei chwblhau a’i dychwelyd at Ysgrifennydd y Pwyllgor o fewn un mis i gyfarfod y Pwyllgor Cymeradwyo Rhaglenni y rhoddwyd cymeradwyaeth amodol ynddo, neu’r ffrâm amser ar gyfer cwblhau a nodwyd ar y Ffurflen Ymateb i Amodau/Cadarnhadau. Rhaid i unrhyw ddiwygiadau i fanyleb y rhaglen neu ddogfennau cysylltiedig sy’n deillio o hynny gael eu gwneud o fewn y ffrâm amser trwy’r system Cymeradwyo a Rheoli Rhaglenni ar-lein hefyd. Sylwer: mae cyflawni Amodau/Cadarnhadau yn un o’r gofynion ar gyfer darparu.

Os yw’r Pwyllgor Cymeradwyo Rhaglenni yn gwneud unrhyw argymhellion ar gyfer gwella eich rhaglen, rhaid mynd i’r afael â’r rhain, a rhaid i’ch ymateb gael ei gymeradwyo gan y Pwyllgor Cymeradwyo Rhaglenni. Bydd argymhellion wedi’u diffinio o fewn y System Cymeradwyo a Rheoli Rhaglenni neu drwy Ffurflen Ymateb i Amodau/Argymhellion (fel y bo’n briodol), a gallant olygu bod gwelliannau pellach yn ofynnol i ddogfennaeth y cynnig. Dylid mynd i’r afael ag argymhellion o fewn tri mis i gyfarfod y Pwyllgor Cymeradwyo Rhaglenni y cafodd y rhaglen ei chymeradwyo ynddo.

Dylai’r Ffurflen Ymateb i Argymhellion gael ei chwblhau a’i dychwelyd at Ysgrifennydd y Pwyllgor o fewn tri mis i gyfarfod y Pwyllgor Cymeradwyo Rhaglenni y gwnaed y penderfyniad cymeradwyo ynddo. Dylid nodi ar y ffurflen pa gamau y mae Tîm y Cynnig wedi’u cymryd tuag at fynd i’r afael â’r argymhellion ar gyfer gwella neu, os nad yw’r tîm yn teimlo bod angen mynd i’r afael ag argymhellion, y rhesymau pam ei fod yn meddwl hynny. Sylwer: Mae’n ofynnol ymateb i’r holl amodau. Nid oes disgwyl i chi weithredu’r holl argymhellion er mwyn i gymeradwyaeth gael ei rhoi. 

Mae hyn yn hynod anarferol ac anaml iawn y mae’n digwydd, gan fod y Gwasanaethau Ansawdd Academaidd a’r Colegau’n cydweithio’n agos gyda’r timau Datblygu Rhaglenni i sicrhau bod cynigion am raglenni newydd yn wynebu’r siawns orau o lwyddo. Fodd bynnag, mae’n dal yn bosibl na fydd y cynnig yn ddigon da i argyhoeddi’r Pwyllgor Cymeradwyo Rhaglenni y bydd y rhaglen yn gallu darparu’r lefel o brofiad ar gyfer myfyrwyr sy’n ofynnol. Os nad yw eich rhaglen yn cael ei chymeradwyo, yn y lle cyntaf dylech gysylltu â’r Gwasanaethau Ansawdd Academaidd yn quality@abertawe.ac.uk a bydd y tîm yn asesu unrhyw wendidau yn y rhaglen ac yn eich cynorthwyo i gywiro’r materion hyn. Unwaith yr ydych wedi mynd i’r afael â hwy, gall y cynnig gael ei ailgyflwyno i gael ei ailystyried gan y Pwyllgor. 

Er mai anaml y mae hyn yn digwydd, mae wedi digwydd ar adegau bod cynigion am raglenni ddim yn ddigon da, neu heb gael eu mireinio ddigon, i gael eu cymeradwyo ar yr ymgais cyntaf. Rhaid i’r Pwyllgor Cymeradwyo Rhaglenni fod wedi’i sicrhau bod y rhaglen fel y caiff ei chynnig yn y ddogfennaeth yn gallu darparu’r lefel o brofiad ar gyfer myfyrwyr a ddisgwylir. Prif achosion methu â chael cymeradwyaeth i raglen yw:

• Dogfennaeth anghyflawn neu annigonol
• Dogfennaeth wedi’i rhuthro a/neu ddogfennaeth wedi’i chyflwyno’n hwyr
• Diffyg ymgysylltu â’r broses neu arbenigedd perthnasol yn ystod gwaith datblygu
• Risg mawr a/neu gynigion wedi’u hystyried yn wael
• Diffyg cynllun wrth gefn ar gyfer achosion pan fo pethau’n mynd o’i le (yn anad dim mewn rhaglenni Cydweithredol)

Unwaith y mae’r Pwyllgor Cymeradwyo Rhaglenni wedi argymell bod rhaglen yn cael ei chymeradwyo (a bod unrhyw amodau wedi cael eu bodloni), bydd tîm y Gwasanaethau Ansawdd Academaidd yn cymryd y camau canlynol i sicrhau bod y rhaglen yn cael ei chymeradwyo’n llawn:

• Cwblhau camau cymeradwyo priodol ar y system Cymeradwyo a Rheoli Rhaglenni
• Hysbysu’r Adrannau Gwasanaethau Proffesiynol i sicrhau eu bod yn ymwybodol o’r rhaglen newydd
• Sicrhau bod y codau Rhaglen ac UCAS perthnasol wedi cael eu sefydlu, a bod y rhaglenni wedi’u rhestru yn y Catalog Rhaglenni
• Sicrhau bod y tag ‘yn amodol ar gymeradwyaeth’ yn cael ei ddileu o unrhyw ddeunydd a thudalennau gwe hyrwyddo (lle y bo’n ofynnol)
• Sicrhau bod y rhaglen newydd yn cael ei chynnwys yn y ffurflen Set Wybodaeth Allweddol (lle y bo’n berthnasol)
• Sefydlu’r Broses Adolygu Ansawdd

Hefyd, bydd yn ofynnol i Gyfarwyddwr y Rhaglen gymryd ystod o gamau i sicrhau bod y rhaglen yn cael ei hyrwyddo’n briodol, bod y seilwaith dysgu wedi’i sefydlu a bod y rhaglen yn recriwtio myfyrwyr. 

Gall y Pwyllgor Cymeradwyo Rhaglenni gyfethol aelodau fel y bo’n ofynnol i sicrhau bod arfer da’n cael ei rannu ac i gynnig y cyfle i staff ddatblygu sgiliau mewn adolygu a chymeradwyo rhaglenni. Fel arfer caiff aelodau’r Pwyllgor Cymeradwyo Rhaglenni eu henwebu gan Benaethiaid Colegau, a chaiff yr aelodaeth ei hadolygu’n flynyddol i sicrhau bod aelodaeth gytbwys ar draws pob Coleg/Ysgol. Hefyd, caiff rhai aelodau o’r Pwyllgor Cymeradwyo Rhaglenni eu penodi oherwydd rôl benodol, megis arbenigedd mewn darpariaeth gydweithredol, ymchwil ôl-raddedig neu raglenni proffesiynol. Os oes gennych chi ddiddordeb mewn ymuni â’r Rhaglen Cymeradwyo Rhaglenni, anfonwch neges e-bost i quality@abertawe.ac.uk.

Fel aelod o’r Pwyllgor Cymeradwyo Rhaglenni, mae gennych rôl allweddol o ran sicrhau ansawdd a safonau ymchwil a addysgir ac ymchwil ôl-raddedig ar draws y sefydliad, ac o ran sicrhau bod myfyrwyr sy’n cofrestru ar raglenni newydd yn cael profiad rhagorol. Y dyletswyddau allweddol yw mynychu cyfarfodydd (nid pob cyfarfod), a chynnal adolygiadau o gynigion am raglenni ac unrhyw ddiwygiadau i raglenni presennol. Mewn rhai achosion gellir gofyn i aelodau weithredu fel Adolygwyr Arweiniol.

Mae gwaith aelodau’r Pwyllgor Cymeradwyo Rhaglenni yn amrywio, ond ar y cyfan mae’n golygu darllen trwy’r cynigion am raglenni ar gyfer pob cyfarfod y byddwch yn bresennol ynddo, a bod yn barod i gwestiynu tîm y rhaglen i sicrhau bod y Pwyllgor yn gallu sicrhau ansawdd y cynnig a’r cynnwys academaidd. Ar y cyfan, mae cyfarfodydd y Pwyllgor Cymeradwyo Rhaglenni yn gyfyngedig i ystyried tri chynnig, neu grwpiau o gynigion (lle gall fod fersiynau llawn-amser a rhan-amser, neu lefelau cymwysterau gwahanol o fewn yr un maes pwnc). Mae hefyd o fudd bod aelodau’r Pwyllgor Cymeradwyo Rhaglenni yn mynychu sesiynau hyfforddi i roi iddynt yr offer i adolygu rhaglenni’n effeithiol. Mae’r Gwasanaethau Ansawdd Academaidd yn gweithio gyda Cholegau i sicrhau bod cynigion yn cael eu cyflwyno i’w hadolygu mewn da bryd, a’r bwriad yw bod papurau’r Pwyllgor Cymeradwyo Rhaglenni yn cael eu rhyddhau i’w hadolygu o leiaf wythnos cyn y cyfarfod.

Caiff Adolygwyr Arweiniol eu penodi i adolygu cynnig am raglen yn fanwl ac arwain y broses o gwestiynu Tîm y Cynnig yn ystod cyfarfod y Pwyllgor Cymeradwyo Rhaglenni, yn unol â chyfarwyddiadau’r Cadeirydd. Mae’r rôl hon yn helpu i sicrhau bod pob rhaglen yn cael ei hadolygu’n fanwl, ac yn helpu holl aelodau’r Pwyllgor i rannu’r cyfrifoldeb am adolygu.

Mae cynrychiolwyr myfyrwyr yn cyflawni rôl allweddol o ran adolygu a chymeradwyo rhaglenni. Mae rôl y cynrychiolydd myfyrwyr yr un fath ag aelodau eraill y Pwyllgor, sef adolygu’r cynnig am raglen newydd i sicrhau bod y rhaglen yn addas i’w diben, ei bod yn cyrraedd safonau allanol a mewnol ac y bydd yn darparu profiad rhagorol ar gyfer myfyrwyr. Yn arbennig, mae cynrychiolwyr myfyrwyr yn cael gorchwyl i ystyried y rhaglen o safbwynt myfyrwyr, er mwyn sicrhau bod y dysgu a’r addysgu, y cymorth a’r profiad ar gyfer myfyrwyr ar y cyfan yn debygol o gyrraedd y safonau uchel a ddisgwylir gan y Brifysgol. Mae canllaw llawn i fyfyrwyr ynghylch adolygu rhaglenni newydd ar gael yma. Yn ogystal, bydd y tîm Gwasanaethau Ansawdd Academaidd yn gallu darparu cefnogaeth a hyfforddiant cyffredinol a theilwra i chi.

Er mwyn sicrhau bod y Pwyllgor Cymeradwyo Rhaglenni yn gallu craffu’n briodol ar gynigion am raglenni, bydd yn adolygu dim mwy na 3 chynnig ar y cyfan (ar gyfer rhaglenni newydd neu ddiwygiedig) ym mhob cyfarfod. Bydd Adolygwr Arweiniol yn cael ei aseinio i bob rhaglen.

Mae’r Gwasanaethau Ansawdd Academaidd yn darparu nifer o sesiynau hyfforddi ar gyfer aelodau’r Pwyllgor Cymeradwyo Rhaglenni i’w cynorthwyo i adolygu a sicrhau ansawdd rhaglenni newydd. Ceir gwybodaeth ar wefan y Gwasanaethau Ansawdd Academaidd.