Asesu a Rheoli Risg

Ceir disgwyliad y byddai ymweliad â safle unrhyw bartner posibl yn cael ei gynnal cyn y byddai’r Brifysgol yn anfon myfyrwyr ar raglenni symudedd allanol i gynnal Dyletswydd Gofal y Brifysgol tuag at ei myfyrwyr a bydd dull seiliedig-ar-risg yn cael ei ddefnyddio. Fodd bynnag, mae o’r pwys mwyaf sicrhau cydraddoldeb o ran y profiad ar gyfer myfyrwyr. Byddai  adroddiad ar ymweliad â’r safle (templed ar gael gan y Gwasanaethau Ansawdd Academaidd) yn rhan o ddogfennaeth ategol y broses diwydrwydd dyladwy. Gallai’r ymweliad â’r safle gael ei gynnal gan aelod o staff academaidd neu gynrychiolydd y Gyfarwyddiaeth Partneriaethau Academaidd neu’r Swyddfa Datblygu Rhyngwladol, fel y bo’n briodol.

Caiff asesiad risg ei gynnal gan Golegau/Ysgolion/y Gwasanaethau Ansawdd Academaidd (gan ddibynnu ar natur y cydweithio) ar yr holl gynigion i asesu lefel y risg sy’n gysylltiedig â’r sefydliad partner a threfniadau partneriaeth arfaethedig. Byddai mentrau sydd â risg mwy yn gysylltiedig â hwy a phrosiectau mwy yn golygu cyswllt pellach ag Adran Cydnerthedd a Pharhad Busnes y Brifysgol a’r Uned Cynllunio a Phrosiectau Strategol.

Mae diwydrwydd dyladwy academaidd yn ystyried ansawdd ac enw da academaidd y partner arfaethedig ac fe’i defnyddir i benderfynu a oes ganddynt y pwerau dyfarnu gradd, yr adnoddau addysgu ac ymchwil a’r gallu angenrheidiol i ddarparu profiad cydradd ar gyfer myfyrwyr i allu bod yn rhan o’r fenter cydweithio. Dylai diwydrwydd dyladwy academaidd gael ei gynnal gan y Coleg perthnasol/yr Ysgol berthnasol (neu’r tîm ymweld â safleoedd, a all gynnwys y GPA/GAA) a bod wedi’i deilwra i natur y cydweithio arfaethedig. Caiff y meysydd canlynol ar gyfer craffu eu nodi yn y ddogfen International Partnerships: A Legal Guide for UK Universities:

• Gofynion achredu yn y diriogaeth sy’n berthnasol i’r bartneriaeth bosibl;
• Nifer, cymwysterau, arbenigedd a chapasiti staff academaidd, staff gweinyddol a staff cymorth allweddol ar gyfer gweithredu’r bartneriaeth a threfniadau i recriwtio staff ychwanegol lle y bo’n ofynnol;
• Nifer, cymwysterau, arbenigedd a chapasiti staff academaidd ar gyfer cyflawni gweithgarwch marchnata/ recriwtio myfyrwyr/addysgu/ymchwil yn ôl y trefniadau partneriaeth a ragwelir;
• Argaeledd ac ansawdd cyfleusterau a deunyddiau (ymchwil, labordai, lleoliadau addysgu, mynediad at lyfrgelloedd, llety, cyfleusterau TG ar gyfer myfyrwyr a chyflogeion, lles myfyrwyr);
• Y broses recriwtio a meini prawf dethol ar gyfer myfyrwyr sy’n cyfranogi (os oes rhai);
• Safonau academaidd a meini prawf a gweithdrefnau asesu ac arholi;
• Cymwysterau ieithyddol aelodau allweddol o’r gyfadran, cyflogeion a myfyrwyr;
• Trefniadau sicrhau ansawdd;
• Profiad blaenorol y partner arfaethedig o bartneriaethau â phrifysgolion eraill yn y DU ac argaeledd geirdaon academaidd annibynnol.

Mae diwydrwydd dyladwy cyfreithiol yn hanfodol ar gyfer pob menter cydweithio. Fodd bynnag, bydd ei natur a’i faint yn dibynnu ar risg y prosiect. Mae diwydrwydd dyladwy cyfreithiol yn golygu canfod pŵer ac awdurdod sefydliadau eraill i gymryd rhan yn y fenter cydweithio a chanfod unrhyw faterion cyfreithiol a allai amharu ar y prosiect, neu barodrwydd Prifysgol Abertawe i weithio gyda’r sefydliad arall. Byddai maint y gwaith diwydrwydd dyladwy sy’n angenrheidiol yn dibynnu ar natur y cydweithio arfaethedig. Byddai mentrau â mwy o risg a phrosiectau mwy yn golygu cyswllt pellach â Thîm Gwasanaethau Cyfreithiol y Brifysgol.

Fel rhan o ymholiadau diwydrwydd dyladwy, bydd statws Haen 4 (a Haen 2, os yn briodol) y partner/cynnig yn cael ei gadarnhau. Byddir yn ymchwilio hefyd i unrhyw faterion sy’n ymwneud â chydymffurfiaeth fisa Haen 4 (a Haen 2) UKVI.

Haen 4 o’r System Seiliedig ar Bwyntiau yw’r prif lwybr mewnfudo ar gyfer myfyrwyr o’r tu allan i’r AEE sy’n dymuno astudio’n llawn-amser yn y DU. Rhaid bod y myfyrwyr hyn yn cael eu noddi gan ddarparwr addysg sy’n meddu ar drwydded Haen 4. Caiff y darparwr addysg ei alw’n noddwr. Mae’r gyfundrefn nawdd Haen 4 yn seiliedig ar ddwy egwyddor sylfaenol. Yr egwyddorion sylfaenol yw:

1. braint ac nid hawl yw nawdd, felly rhaid i’r rhai sy’n cael y budd mwyaf uniongyrchol o ymfudo gan fyfyrwyr (darparwyr addysg) helpu i atal y system rhag cael ei chamddefnyddio; a
2. rhaid bod y rhai sy’n ymgeisio i ddod i’r DU i astudio yn gymwys i wneud hynny, a rhaid bod ganddynt ddarparwr addysg dibynadwy sy’n wirioneddol yn dymuno eu haddysgu.

Byddai ymholiadau diwydrwydd dyladwy cyfreithiol yn cadarnhau cydymffurfiaeth. Er enghraifft:

• Beth yw statws Haen 4 y partner/cynnig?
• A oes unrhyw faterion o ran cydymffurfiaeth fisa Haen 4 UKVI y dylid bod yn ymwybodol ohonynt?
• A yw’r prosesau monitro’n ddilys ac yn gydradd?

Gellir dod o hyd i ragor o wybodaeth yma.

Diben diwydrwydd dyladwy ariannol yw penderfynu:

• A oes unrhyw beth a ddylai atal Prifysgol Abertawe rhag ymrwymo i’r trefniant hwn?
• A oes materion y mae angen i Brifysgol Abertawe ei diogelu ei hun rhagddynt yn y contract?
• A oes risg o fethiant ariannol neu bryderon ynghylch diddyledrwydd?
• A oes pryderon ynghylch cynaliadwyedd ariannol?

Mae rhyw fath o ddiwydrwydd dyladwy ariannol yn angenrheidiol bob amser. Fodd bynnag, bydd yr hyn y mae ei angen yn dibynnu ar y trefniant ei hun. Diben diwydrwydd dyladwy ariannol yw gwirio cryfder ariannol sefydliad. Ar ei fwyaf cyfyngedig gall fod yn fater o wirio gwybodaeth ariannol sydd ar gael yn gyhoeddus. Ar ei fwyaf helaeth gall gynnwys hanes ariannol a hanes treth eich partner, a’r sefyllfa sefydliadol, y sefyllfa o ran rheolaeth a’r sefyllfa statudol. Byddai gwybodaeth am y math o bartner a’i risg cysylltiedig yn ofynnol, e.e. ai sefydliad cyhoeddus/mewn perchnogaeth wladol yw’r partner arfaethedig, ynteu ai sefydliad mewn perchnogaeth breifat ydyw? Byddai angen i sefydliadau nad ydynt yn rhai cyhoeddus gael cymeradwyaeth ariannol gan y Pennaeth Cyllid (neu ei gynrychiolydd). Felly bydd angen i’r amser a’r costau sy’n gysylltiedig â hyn gael eu hystyried fel rhan o gynllun busnes y Coleg ar gyfer y fenter cydweithio. Byddai mentrau â mwy o risg a phrosiectau mwy yn golygu cyswllt pellach ag Adran Gyllid y Brifysgol.

Cynhelir diwydrwydd dyladwy moesegol i ganfod a yw’r partner arfaethedig yn alinio â pholisi a gwerthoedd Prifysgol Abertawe. Mae hyn yn bwysig gan y gallai diffyg aliniad effeithio’n anffafriol ar gydraddoldeb y profiad ar gyfer myfyrwyr ac achosi risg sylweddol i enw da’r Brifysgol. Dyma’r meysydd a fyddai’n cael eu hystyried fel arfer:

• Cydraddoldeb, Amrywiaeth a Chynwysoldeb;
• Cynaliadwyedd;
• Hawliau Dynol;
• Moeseg;
• Eiddo Deallusol;
• A oes gan y partner arfaethedig unrhyw gysylltiadau neu berthnasoedd a allai achosi pryder? Er enghraifft, arfau, tybaco, cwmnïau olew, gweithrediadau mewn gwledydd nad ydynt yn gyson â gwerthoedd y Brifysgol.
• A oes unrhyw bryderon cyfredol ynghylch teithio i/iechyd a diogelwch yn y lleoliad partner? Er enghraifft, a oes unrhyw gyngor cyfredol gan y Swyddfa Dramor a Chymanwlad?

Byddai mentrau â mwy o risg a phrosiectau mwy yn golygu cyswllt pellach â nifer o adrannau’r Brifysgol i gael cyngor, e.e. Llywodraethu, y Swyddfa Datblygu Rhyngwladol, yr Adran Cydnerthedd a Pharhad Busnes.